侍仔：各位鍾意欣賞技術較量嘅球迷，今晚就可以大飽眼福囉！西甲休息咗成個夏天，今晚就由華倫大戰貝廸斯。
招積域：有乜咁好睇呢？球員嘅名個個都一樣，唔係叫做「費蘭度」就係乜嘢「華廸斯」，叫人點樣分呢？
菠蘿文：你懶就懶啦！睇多幾場咪知人哋講緊邊個囉，波又唔睇，又要喺度也文也武，唔使講你一定重注巴塞啦！
招積域：主場喎，仲唔重插咩？唔使講㗎啦，華倫一定搵貝廸斯祭旗！
侍仔：話你識少少扮代表啦死仔！乜你唔知西甲一向無所謂主場優勢，升班馬都可以作客擊沉勁敵，你咪話無冷爆呀今場。
西甲無主場優勢
招積域：我係賭仔，但我就偏唔信邪嘅！你話主場無優勢咩，但巴塞上季主場未輸過一場㗎，呢個數據仲唔強過乜嘢「無主場優勢」嘅迷思？信呢個理論就等於信「英甲波、蠱惑多」一類口水句子。
林伯：𡃁仔！今次我林伯就撐硬你啦！年輕人唔好信咁多「理論」，照你哋咁講，踢波嗰啲咪唔使踢？踢低組別又驚打假波。賭波做功課靠自己，你睇到幾多咪幾多囉。華倫主場上季只輸過一場係事實，無謂專登企喺人哋對家搞事啦！
侍仔：無人話搞事喎，大家都係討論吓啫，阿伯！
林伯：你啲後生仔些少禮貌都無！我叫林伯，唔係叫阿伯，唔該你分清楚先好叫我！
侍仔：係囉！你叫做林伯，成日無事做落嚟同人搵交嗌！我先前話明唔俾面你㗎，𠵱家華倫首戰貝廸斯，我撐硬華倫。今屆整條中場線都係西班牙國腳，前線有韋拿同摩連廸斯，問你隊貝廸斯點樣頂？
林伯：都話咗西甲無主場優勢，華倫整班西班牙國腳又如何？貝廸斯打嘅向來唔係名氣波。今場你哋班𡃁仔睇住貝廸斯發威啦！不聽老人言。
招積域：林伯，你睇到嘅嘢同我哋咪一樣，唔好係恃老賣老啦！你咪又係人講你又講。
菠蘿文：有時聽吓人講，可能下注時候真係會有得着呢？賭多你10年就係10年，拗都無謂。
高洛文