我想輸，所以估西甲波！
自懂得足球投資後，一直深感今晚揭幕嘅西甲係比意甲更難預測，小弟多損手離場！巴塞人腳大致同上屆差不多，但皇馬、華倫、馬體會都有唔少新球員加盟，西甲今季會亂上加亂！
乜嘢係西甲精神？我認為係估大開細、主場無優勢、作客踢高一班、熱門頻爆冷……總之你諗唔到嘅，西甲都會發生！一個咁有戲劇性嘅聯賽，係咪好有觀賞賣點呢！
華倫係我鍾意最耐嘅西甲球隊，艾馬離隊，好可惜！我只好睇多啲薩拉戈薩啦！冇咗艾馬當然大影響，但係無埋賓尼廸斯先係致命傷！呢班波要重新搵番自己贏波嘅方程式。當年由艾馬負責策動反擊，安古路、維辛廸、巴拉查等球員互相支援。
𠵱家嘅華倫，唉！傷嘅傷、走嘅走，我只期待發夢時睇到華倫重拾昔日光輝！不過，今晚主場對貝廸斯，我點都撐華倫！
唔信車仔會連敗
另外，皇馬主場，無得輸，大家可以放心！反而我覺得馬體會對住桑坦德會出事！後者主場曾迫和巴塞贏馬體會，各位球迷小心呀。
最後，我今周會再撐車仔，我就唔信佢會再輸！
商業1台《球迷集中贏》主持周鵬
電郵：[email protected]