【本報訊】「法官點判都好，我都唔會原諒佢哋（各被告）！響大陸咁樣打死人，實拉去打靶啦。」肥妹父親劉官喜昨得悉各被告的刑期後說：「法官都有仔女，亦應該知道父母養大一個仔女嘅辛苦，何況當年我一個人養一家五口，𠵱家個女俾十幾人打死咗，我唔明法官點解會輕判佢哋。」
母避見兇手拒上庭
「告佢哋誤殺已經係輕啦，十幾人打死我個女先坐幾年監，梗係輕判！」劉母林觀嬌雖不滿各被告獲輕判，但她補充稱：「我個女都死咗兩年，兇手𠵱家判刑坐監，都算告一段落。」劉母昨並沒有到法庭，反而在茶果嶺村與街坊打麻雀，但當記者問她對判決的反應時，她又即時淚流滿面地說：「我唔去聽係唔再提傷心事，我唔想見到害死我個女嘅衰人。呢班人判坐幾耐都冇用，坐完監出來又係禍害社會。」
陪同劉母的內地媳婦解釋說：「佢響屋企一得閒就會諗劉美英，一諗就會喊，所以我哋叫佢去打麻雀，希望佢可以暫時忘記傷心事；佢睇到劉美英嘅新聞都會喊，屋企人好擔心佢會做儍事，所以叫我申請落嚟照顧佢。」為免劉母受刺激，家人會將有關報道該案的報紙收起。
「劉美英生前攞過好多義工獎狀，燒得嘅我都燒晒，我只留呢個水晶作紀念。」劉氏夫婦又從家中抽屜拿出肥妹在高雷中學時奪得的運動獎牌，這些獎牌均是擲鐵餅及推鉛球奪得。