今年股市表現，叫做唔錯，點都好過衰到貼地嘅○三年好多，偏偏○三年啲證券行冇出事，今年就一連發生三單。五月有鴻運證券爆煲，七月有大發證券，八月有永業證券，令唔少散戶投資者蒙受損失。
證監會每個月金睛火眼咁吼實證券行嘅報表，並且突擊巡查，令一啲證券行避無可避，唯有自動引爆。通常發生周轉不靈嘅證券行，喺資產負債表上嘅應收賬款（receivable）會露出馬腳，譬如以一連十二個月為期（譬如由舊年七月睇到今年六月），股市有升有跌，成交量有高有低，證券行生意有好有壞，但係每月底之應收賬款總係高於一個定額數目──譬如三千萬元，硬係有上升，冇回落──呢筆應收賬款就有可疑之處，必須深入調查，逐個客戶逐筆賬款做breakdown（細分），好快就搵到結果，可能係一個人客死咗火好耐，冇力還債，但證券行唔敢撇賬，一味死頂，故作玄虛，掩人耳目。
可惜吖，散戶睇唔到證券行之資產及負債表，故此監察責任全放在證監會身上。連續三件爆煲案之後，證監益發追查得嚴厲，一方面做多啲巡查，一方面呼籲散戶開設「投資者戶口」。散戶最安全嘅做法就係開設「投資者戶口」，但賣貨，轉倉比較麻煩（因證券行收取費用，某些證券行仲乘機收多啲），散戶覺得不便，所以開設投資者戶口冇乜興趣。如果係咁，大家不如去銀行買賣股票算啦，起碼夜晚瞓覺瞓得安樂，唔怕一覺醒來，睇到《蘋果日報》報道某某證券行爆煲，中獎嘅竟然係自己。
證監會查得嚴，好唔好？原來有人認為唔好，指責證監會追得太緊，令人增加成本，搵唔到食，可能會向馬局長投訴政府政策向銀行傾斜，打擊證券業生存。呢啲係乜嘢邏輯，木宰羊，正是人不為己，天誅地滅，利字當頭之際，哪管得散戶安唔安心。假如呢種賴地硬之心態不變，唔肯放棄陋習嘅話，銀行嘅股票市場佔有率勢將有增無減。