好多人都好關心警務處處長李明逵退休後去向，因為實在傳聞多多，而且言之鑿鑿，話煲呔埋班唔夠人，所以要一哥明年初提早退休，等候第三屆特首發落，分分鐘有問責局長佢做。
一哥嘅畫家太座許雁芬噚日喺第八屆西區文化藝術節開幕禮亦故作神秘，係咁笑話：「你哋想知就自己去問佢」，咁即係唔答啫，一哥咁口密，問都無謂。不過，好在佢都加番句：「佢（李明逵）其實都有藝術眼光㗎」，當堂令八方眼前一亮。
唔好以為李太退休前係總警司，同老公嘅形象都係硬繃繃，原來甚有藝術細胞嘅李太退休後去拜師學水彩畫，今次中西區作品展中有佢四幅作品，除一幅舞獅外，其餘三幅都係警察系列，真係不離本行。
李明逵人唔到花到
八方細心欣賞，李太跟沈老師學畫四年，都算畫得好唔錯。佢話老公噚日冇嚟到，不過第二日一定會嚟睇，而八方亦發現佢老公果然識做，託人買個大花籃嚟賀吓老婆。李太言語之間更加稱讚老公其實有藝術眼光，事關有時佢畫畫，旁邊嘅老公間唔中會畀啲顏色同光暗意見。
八方後來同佢講到個喺英國做腦科醫生個仔，佢話個仔最近一次返嚟係今年初舊曆新年期間。另外，堂阿哥前警務處處長許淇安都「幾好」咁話。
最後八方問佢：「有冇買到六合彩？」點知佢即刻哈哈大笑，又耍手擰頭，大概係勾起佢嘅開心回憶。事關佢老公喺95年跟同僚夾份買中六合彩，瓜分咗成三千八百萬，由於佢老公其中一名同事「甩底」而夾咗兩份，結果佢合共贏得700萬元嘅彩金。咁好運，就算李明逵退休後唔做嘢，應該都冇乜問題。
嗱，邊個想去睇李太同一批本地畫家嘅水彩同油畫作品就要快，因為個展覽只係展到下周二（29日），地點係大會堂展覽廳。