中移動（941）與滙控（005），總共拉高恒指69點，幾乎係恒指全部升幅（72點）。全城焦點，擺喺長和身上。長實（001）跌0.20元，和黃（013）唔見0.65元，只不過拖低恒指10點，揸長和正股，冇乜點傷。揸長實C輪，傷少少；揸和黃C輪，普遍則好傷，死火輪榜上頭6位，有4隻係和黃C輪，白骨纍纍。
和黃C輪：和黃C輪最重創嘅係3561，收3.1仙，大散48%，死火輪榜上排第2，唔係亁散，有1.30億份成交，幾乎係街貨（1.41億元）嘅全部，成交金額接近500萬。隻輪下月14日最後買賣，剩番14個交易天，正股升唔夠3.23元，隻輪就jarless（冇渣）。3561今年3月發行，發行價43.5仙，一堆白骨在眼前。
和黃兩日共跌2.40元，就嚟可以博反彈，博大超人增持帶來啲啲超人效應。以前都試過好多次，長和系派成績表後，大股東增持。博和黃C輪，咪搞3561，諗4751。
長實C輪：長實受3G可能拖累嘅程度，打折扣，走勢可望靚過和黃。現價較上周高位低咗4.25元，又係就嚟可以博反彈，博大超人增持。
受得起刺激嘅話，雞仔注向3622埋手。隻輪10月初到期，輪價32.5仙，溢價1.5%，槓桿率25.9倍（有效17.9倍），引伸波幅17.6%。遠期啲嘅，則諗9053。
章盛