富豪圈今期興講捐身家，香港首富李嘉誠都話，將來有三分一財產放入李嘉誠基金會，咁啱會德豐噚日開股東會，八方梗係要問吓會德豐兼九倉主席吳光正會唔會又學人捐錢，唔計吳生嘅私人財產，淨係呢兩間上市公司，總市值都超過900億。
你估吳生點答？佢竟然大笑三聲：哈哈哈，然後拋低一句：「每個人喺唔同時候做唔同嘅嘢」，之後揚長而去！好明顯，吳生咁答法，即係話𠵱家唔係佢捐身家嘅時候啦。
既然唔講捐錢，八方就轉話題講吓佢位千金吳宗恩，吳主席向來都好錫呢粒女，每逢聽到人哋讚個女，仲開心過自己執到金。幾年前吳光正已經安排阿女入連卡佛打骰，令到呢間百年老店成個後生晒，噚日間舖出咗個人事變動聲明，話做咗十個月嘅總裁DavidRiddiford會辭工返英國，佢個位就由吳小姐做埋，你話有個有錢老竇幾好呢。