靜咗好耐嘅汽車股又見翻身，長城汽車（2333）日前公布業績，盈利勁升81%，即時獲大行調高評級，例如大摩就話可以增持長城汽車，目標價6.66元，不過長城汽車已連升兩日，昨日又升7.51%，高收6.30元，現價計落，已經無咩水位。
經紀黃話無辦法，皆因平時唔係太多大行cover嘅股票，一經大行品題之後，就引嚟成班投資者撲落去買貨，搞到好多時三扒兩撥就達到目標價，真係朝早睇少一陣都唔得。
另外，濠賭股呢排大部份表現都唔係好得，例如噚日無論信德（242）、新濠（200）或者銀河娛樂（027），3大龍頭股統統下跌，反而對手金沙又話響澳門街愈做愈掂，所以做金沙貴賓廳叠碼仔生意嘅浩基集團（628），股價終於見到起色，雖然同早幾個月的高價2.30元水平仍差好遠，但起碼已經由近期1.40元低位反彈，昨日微升0.61％，至1.64元。
經紀黃話，據講有間美資證券行有見及此，稍後出發去日本做路演，都想叫埋浩基去。
慕容小初