馬時亨近排除咗要幫唐唐硬銷GST，又要應付證券行爆煲醜聞，真係搞到頭都痕。之不過，見慣大場面嘅佢，都好識平衡身心，好似噚日去聯校科技展度做主禮嘉賓，就用咗大半個鐘巡晒成個場，對學生哥設計嘅超聲波按摩好感興趣，仲攤大隻手即場試用，𠱁得班妹妹仔不知幾開心。
唔只冧女學生叻，對小朋友都有一手，見到班小學生，先屈身拉近距離，再大讚佢哋嘅設計有諗頭，話香港以後都靠晒佢哋，班小朋友聽到之後，直頭開心過見到麥當勞叔叔。
馬仔跟手又主動走去女拔萃個攤位度，事關佢哋攞咗冠軍，仲係由佢親手頒獎。八方同一眾傳媒齊齊跟馬仔去參觀個名為「尿試如晨」嘅設計，攤位成個廁所咁，而阿馬仔就喺呢個廁所入面，跟住幾個女學生𠱁𠱁轉，聽佢哋講解個作品原理，最後就梗係大讚對方「利害利害！」
馬仔同八方講，自己當年揀文科，就係因為冇乜科學頭腦，見到班學生哥咁鬼醒，設計到咁多嘢，真係自歎不如呀！