新藝城時代嘅「開心少女組」成員柏安妮（Ann），從影之前係香港花式溜冰冠軍，樣貌非常正斗，曾拍過多部電影，較為人熟悉嘅計有《為你鍾情》、《開心物語》、《咖喱辣椒》同《風塵三俠》等。阿Ann其後息影多年，仲經歷過一段唔愉快嘅婚姻，97年喺朋友介紹下認識咗美籍華人Calvin，成功覓得第二春，兩年後有情人終成眷屬。
出兒童書行善
再婚後嘅阿Ann生咗兩個寶貝女，𠵱家改行做職業治療師，前晚佢同老公拍拖去灣仔會展出席電影《聯合93》首映，大晒恩愛。問到阿Ann近況，佢話：「我𠵱家有兩個女，大嘅五歲，細嘅兩歲，都唔諗住追個仔，因為我喺明德兒童啟育中心做嘢，呢個都係慈善機構，可以幫小朋友。」
阿Ann話好享受𠵱家嘅生活，嚟緊11月會出一本畀小朋友睇嘅書，仲會拍膊頭搵成龍、張艾嘉、余安安、莫文蔚同鍾鎮濤等藝人講感受，鼓勵小朋友，所有收益作慈善用途。馮仁昭問阿Ann成龍有冇乘機游說佢復出？阿Ann好幽默咁話：「我都唔年輕，咁老，𠵱家一心做慈善嘢。」
