政府成日宣傳要社會和諧，估唔到連多次被指意識不良嘅中文大學迎新營亦受到感染。每年中大迎新營最具特色嘅四院互片喊口號環節，早幾年因為一句「新亞桑拿」俾教育界插到暈，但今時唔同往日，今年幾乎半句不雅口號都聽唔到。
為期四日三夜嘅中大迎新營，噚日高潮所在，係下晝一點半喺本部百萬大道舉行嘅「四院會師」──即係四院互片。成班同學好有秩序，有專人指揮四個書院輪流喊口號，連幾時停幾時開始喊都有晒編排，口號內容非常碎料，不外乎「新亞病夫」、「逸夫懦夫」，或者踩吓其他書院嘅飯堂餸菜難食，同早兩年幾乎句句意淫嘅情景大相逕庭。
雖然好健康，但八方總覺得有啲侷促，皆因每次班同學開始嚟料，總係俾人停住；而且口號內容事前亦全部交畀校方「畀意見」，激烈場面同過火口號自然冇晒啦。中大新生輔導聯合委員會主席張越華教授就話，其實四院互片只係同學之間詐諦鬧吓交，所以點到即止就夠喇。