英超聯常有唔少奇怪事件發生，而當中有唔少都發生在升班馬身上。
好似幾年前一場狼隊對李斯特城賽事，前者上半場輸緊0:3，個個以為佢哋就咁無晒3分之際，下半場狼隊竟然「師傅到」，追吓一球追吓又一球，最後反勝4:3，成就一場不可思議嘅比賽；仲有一場作客贏曼聯1:0，都係一場屬於當屆經典賽事之一。狼隊最後降班，但該年確畀唔少球迷深刻印象。
升班馬最大吸引力就係「驚喜」，有時唔係睇小佢哋，只係對佢哋無咩期望，踢得好少少就會喜出望外。
發掘新星其樂無窮
好似上年韋根季初嘅直升機演出，令唔少人跌眼鏡；而今季嘅雷丁首戰重演狼隊3年前奇迹反勝一役，橋段相似，但難度及質素不可同日而語。
睇升班馬踢波就好似做緊球探一樣，邊睇佢哋比賽，邊發掘有無潛質新星及漏網之魚。呢種「工作」係無償，但就樂趣多多，較普通睇一場賽事更有趣。
TOBY梁靖琪
走出女生宿舍依舊人氣高企，不惜捱更抵夜睇波。