自從李頌熹自己間測量師行清盤，搞到上咗幾日報紙，成為新聞人物之後，大家都知佢兼任嘅房協主席一職，都會搵第二個人做。李頌熹亦好識做，公開表明話9月任滿之後，唔會再角逐連任。咁現在已經8月尾，究竟有咩人選呢？
華華覺得有一個人好適合，就係楊家聲。楊家聲本身係中華煤氣人力資源總監，今年6月底退休，之後以顧問身份留喺煤氣幫手，應該有好多時間做公職。事實佢一向都有做公職，例如薪常會佢就做咗主席，剛剛喺8月至交棒畀羅家駿，政府當時出過新聞稿，讚揚佢在任期間表現傑出。有呢啲背景，要爭取做房協主席應該好有機會。房協呢個機構已有半個世紀，記得和平之後，大量居民要安置，咁啱倫敦市長捐咗萬四鎊「空襲救災基金」嚟，一班有心人就喺48年成立咗房協，問政府攞地建屋廉租畀市民。佢哋嘅歷史仲早過房委會，港島嘅觀龍樓、勵德邨、健康邨；以及沙田乙明邨、葵涌祖堯邨等等都係該會傑作。在七十八十年代，申請到一間房協嘅屋係好多人嘅夢想。
孫明揚的祝福
房協都有過唔聽話嘅時候，例如佢哋試過想北上發展，結果被政府喝停。在曾蔭權當權之後，呢類公職係安插人嘅重要位置，所以楊家聲能唔能夠接李頌熹，關鍵係政府意向，如果有孫明揚嘅祝福，咁就實掂。
李華華
[email protected]
