繼土瓜灣傲雲峰之後，同區翔龍灣話咁快出年就入得伙，加上啓德舊機場發展計劃開始有聲氣，地鐵沙中線又行經呢邊，東南九龍未來肯定大把世界。
中原一姐劉瑛琳睇到呢個新形勢，話會收縮紅磡德民街分行，改為專攻土瓜灣。中記喺海逸豪園漁人碼頭嘅舖位，已經靜靜擴大，由最初得950方呎，兩度增租樓面，𠵱家已經有成兩千零呎。上個月裝修好晒，可以坐四十幾個前線，計劃請多十幾人。
原有班底繼續做黃埔花園、海逸豪園及海名軒換樓客；另由二十人組成嘅新班子，力攻東南九龍呢個潛力龐大嘅市場。一姐仲話，會喺嗰邊沿線搵多一兩個據點，咁就可以連成一氣。
至於一向代理雲集嘅德民街，高峯期中原有四間分行，𠵱家得三間，劉瑛琳話，最大一間2200方呎巨舖，今年11月約滿會摺埋，只保留兩間600零呎細舖。
講開中原，佢哋西半山助理區域聯席董事吳小玲，年初至今累積做到生意1020萬，成為中原集團第一個千萬主管。