台灣情歌王子張信哲下月底在紅館舉行演唱會，與香港小交響樂團演唱首本名曲。明年踏入四字頭的張信哲雖然情歌一籮籮，但說到感情事，已是三個小朋友契爺的他卻揚言早已打消成家立室的念頭，寧願專注事業兼培育新人。
入行多年的張信哲，將於下月22及23日假紅館舉行兩場「張信哲x香港小交響樂團」演唱會，與60名樂手一同演出。所有歌曲都需要重新編曲，但張信哲仍未有時間跟樂團綵排。
請嘉賓好危險
不過教張信哲最感頭痛的，倒是嘉賓問題，日前他接受訪問時以粵語說：「到時我主要唱心目中嘅經典情歌，如果請嘉賓會好危險，因為佢哋未必有太多時間綵排，而且唔係個個都可以壓得住個樂團，分分鐘仲會俾佢哋嘅聲蓋過，所以唔係個個都會有好效果。」
最欣賞張韶涵
明年踏入40歲的張信哲，已計劃好未來路向，他說：「音樂上會更加成熟，確定自己想做嘅嘢，好似我鍾意bandsound，但就唔多適合我演繹，所以我會喺幕後做多啲呢種音樂，亦會慢慢發掘一啲新人。」問張信哲最欣賞哪些新晉歌手？他就說：「我比較欣賞張韶涵，香港嘅新人我就唔多認識喇。」
正所謂「男人40一支花」，鮮有傳出緋聞的張信哲至今仍未打算成家立室，他笑道：「初初過30歲嗰陣都會心急，覺得應該都差唔多，但𠵱家就會順其自然，寧願做番自己鍾意嘅嘢，屋企人都放棄咗催婚。不過因為我好鍾意小朋友，所以已經做咗三個小朋友嘅契爺，咁我都覺得好高興㗎！」
採訪：駱華齡 攝影：仇志德
化妝：AngelYip
髮型：CliffChan@HipHairCulture
場地提供：麗嘉酒店
