喺香港，應該十居其九上網都係用《IE》吧！不過近來喺網上有人Post，話一覺醒來，諗住起身上網睇吓報紙，點知預設個《IE》變咗做《火狐》（Firefox）！事後發現，原來係網友個妹搞鬼，認為個個都用並非代表《IE》好，外國好多人都改晒用《火狐》啦！佢仲話：「再唔係你試吓輸入網址www.ie7.com睇睇，打開都係火狐嚟㗎！」網友唔信，真係依循網址上呢個「ie7」網睇睇，點知大大個《火狐》Logo走出嚟！呢鋪微軟真係冇晒面子，畀人搶先註冊咗個網站。
另有一單網上睇番嚟嘅趣聞，喺美國俄勒岡州（Oregon），有一班Fans喺麥田上畫咗大大個《火狐》Logo，搞到當地人初時誤以為又係外星人作怪！其實呢班Fans主要成員係嚟自俄勒岡州大學嘅學生，佢哋之前已經有好多搞鬼大作，如「火狐氣象球」升空，以作慶祝1億人次下載火狐嚟用咁話。人哋反微軟都反得咁有創意兼有誠意，相反香港人反對乜都係遊行示威抬棺材，睇見都悶啦，點感染其他人呀？
記者︰陸俊雄