大家都應該知道，孫柏文最鍾意用隻金手指去篤爆啲市場已經完全接受嘅荒謬傳言。今日，我想篤爆一個已經流傳喺我哋財經口水佬界好耐嘅傳言。呢個傳言就係，如果一個財經口水佬，可以喺佢嘅專欄裏面獻計，成功幫013和記黃埔嘅3G電話服務扭轉頹勢，和黃老闆李嘉誠（下稱李老闆）就會畀份工佢。
我篤爆呢個傳言嘅方法，就係獻計畀李老闆，希望可以幫3G扭轉頹勢。我嘅建議其實好簡單，就係「和黃買YouTube」。不過首先，畀大家一啲背景資料。YouTube就係早排喺我哋特區大熱，有得睇「巴士阿叔」短片嘅網站。佢提供嘅服務其實好簡單，就係畀網民將任何片段放上YouTube同其他網民分享。
由05年初YouTube成立至今，佢哋未試過賺錢，絕對係一間不折不扣嘅dotcom。佢哋淨係畀上網寬頻嘅錢，都已經被人估計超過150萬美元一個月，每年淨係燒錢都超過1.5億。仲有，已經有好多人出來批評YouTube，話佢「死硬」。有人話佢哋用戶啲短片模糊不清，睇YouTube啲短片就如時光倒流，返去01、02年嗰啲年代嘅電腦短片質素。
又有人話，佢哋始終擺脫不了被指「侵犯知識產權」呢條罪，所以冇大財團肯買佢。（因為喺我哋「get唔到」嘅特區政府眼中，呢條必定係死罪，所以就算當年係「12分10分寸」嘅陳易希搞YouTube出來，都應該未ok已先被政府摺埋。）仲有人話，YouTube冇對手咁進取，唔肯畀人分享「鹹片」同唔肯畀錢啲上載短片嘅用戶，所以會漸漸缺乏競爭力。最後，就算有人肯買YouTube，都要出天價去買，YouTube嘅估價已經去到6至10億美元。
不過無可否認嘅係，今時今日用戶已經每日喺YouTube下載超過一億段短片，即係每個月超過三十億段短片。YouTube亦都吸引咗好多例如SequoiaCapital嘅重量級支持者投資落佢度。不過就算係咁，大家可能會問：「點解孫柏文覺得和黃應該買YouTube救3呢？」其實，如果要知道點解和黃應該買YouTube，就要首先明白3G可以做啲乜。
應計自己嘅marginalcost
簡單來說，3係一個「仲未搵到用戶想要嘅資訊」嘅資訊渠道。仲有，3可以傳送資訊嘅速度，就係啱啱好係四、五年前寬頻嘅速度。所以，YouTube既可以提供資訊畀呢條冇人用嘅資訊渠道，提供嘅資訊又啱啱好係3可以做得到，仲有，正當3可以向用戶收錢，和黃可以解決埋YouTube暫時仲未有方法賺錢呢個難題。
喺噚日和黃公布嘅業績裏面，話上半年3G幫和黃蝕咗119億港元，如果係咁，攞多78億港元去買YouTube都唔算多。記得05年，新聞集團用5億美元去買MySpace嘅時候，有好多人話佢買錯，今日仲有人敢話佢買錯咩？
最後，孫柏文有兩個忠告畀和黃李老闆。第一就係如果要YouTube，就要快手，因為喺今年4月SequoiaCapital用800萬美元投資落YouTube嘅時候，相信YouTube嘅估值應該唔超過1億美元，短短四個月之後估值已經去到6至10億。再遲啲，就算係李老闆都可能唔夠錢買。第二就係唔好再堅守分析員睇得好實嘅「每月客戶平均消費」ARPU呢樣嘢，和黃話上半年每一個3G客戶平均消費422港元，呢個消費水平係會永遠令到3G打唔入主流社會消費模式，和黃應該計佢自己嘅marginalcost，跟住收平啲。
好，計我就獻咗，我仲唔篤爆呢個「有份工」傳言？哈、哈！
孫柏文