旺角商場星際城市最近銳意變身，大搞抽獎宣傳，但有參加者投訴主辦單位疏忽，竟以透明膠箱收集寫滿個人資料的抽獎表格，又毫無防護措施，令私隱不設防。
讀者蕭先生向本報投訴，指星際城市上月舉辦的抽獎活動，未有盡保護參加者私隱責任。他說：「我經常會去旺角睇電腦數碼器材，幾個星期前，慣常咁去星際城市，買完嘢，見到樓梯有張好大嘅宣傳海報，原來搞緊個購物抽獎活動，購物滿100元就可以參加，獎品有唔同嘅數碼產品，幾吸引，就同坐喺旁邊嘅職員攞咗張參加表，填寫個人資料，放入去商場第一層樓梯角個透明收集箱度！」
參加者曾投訴無人理
只是事隔十多天，蕭先生重回舊地，卻感不妥。他說：「我以為啲職員會每日收工嗰陣鎖番個參加表收集箱，最起碼都搵嘢遮住佢！點知有日朝早大約11點左右再去星際，負責職員仲未返，但個收集箱就咁放喺原位，冇人理，內裏積埋嘅參加表又冇收埋，上面寫住嘅參加者資料，完全畀經過嘅人睇到晒！」
最讓蕭先生不滿是管理公司的態度。他說：「表格要求參加者填寫姓名同電話，已經足夠俾啲有心人做好多嘢啦！係推銷都算，至怕俾人打嚟企圖行騙！而且呢個商場多人行，品流又複雜，如果啲私隱俾啲不法分子掌握就危險。最離譜係我同管理公司投訴好多次，但佢哋都闊佬懶理，照舊將個箱擺喺公眾地方，任睇唔嬲！」
接獲投訴翌日，記者曾往旺角星際城市，時間為本月17日早上10時30分。當時商場已經開門，有關的抽獎表格透明收集箱則放在商場往一樓扶手自動樓梯對開的角落處，來往行人可輕易看見。而負責抽獎活動的職員仍未上班，抽獎箱則沒有任何覆蓋，只要靠近抽獎箱，即可清楚看見填寫於表格背面的參加者個人資料，例如姓名、電話和身份證的字母及首四個號碼。
負責人：唔想再糾纏
記者致電星際城市管理處負責人鄭先生，查詢抽獎活動，有洩露參加者私隱風險之嫌，鄭先生強調說：「個抽獎箱已經搵嘢封番住，唔想再喺呢個問題糾纏；而且係最初幫我哋搞呢個活動嘅刊物，冇建議做呢樣嘢（覆蓋膠箱）！」
至於被問及作為舉辦單位，難道並沒察覺以透明膠箱，於公眾地方收集參加者資料有不妥時，鄭先生則指「有權不接受訪問」，匆匆掛線。
檔案編號：0817030
