剛剛完結嘅美食博覽，場內好多又新又平嘅食品出面街仲未有得賣，除造就一眾為食人士瘋狂入貨外，亦餵飽唔少特登入場試食試到飽嘅朋友。香港討論區飲飲食食Forum就有網友Post咗呢個題目：「有邊個去完美食博覽想講下（吓）感受呀？」唔少網友話場內食品又平又新，每年都要去，不過亦有唔少網友鬧喎。問題少女1號話︰「其實都見到好多平野（嘢），不過有d（啲）實在太重了，唔想辛苦自己。」朱投炳嬲得要郁手郁腳︰「果（嗰）啲手拉車周圍都係，我唔怪得人要拉架車去掃貨，但係好多都無公德心地周圍拖而擋住行人。其實好多時人逼時我都不時起腳踢開果（嗰）啲手拉車。」himalayan仲激︰「啲人好無公德心，坦克車周圍碌，食物嘅包裝、竹籤，有垃圾筒（桶）都掉到周地都係……」「我喜歡飲食，但不喜歡辛苦自己，記得某年某牌子嘅醬料$1樽……見/聽到唔少人，唔理咩醬只因平就狂掃……」又係喎，得個平字就買，分分鐘可能擺埋一邊食唔晒。
網址︰ http://www9.discuss.com.hk/viewthread.php?tid=2126405&extra=page%3D4