建築H呢一年做得好忙碌，經常來往內地與澳門之間，反而返到香港，行色匆匆，安慰老婆兩日，又試出門。呢日咁啱喺史丹利街撞到佢，順便傾幾句。建築H話香港冇地盤做，生意慘淡，但在澳門與內地就接到唔少項目，故此常到澳門、內地。去得咁密，老婆容乜易有危機感？建築H連聲話冇，出門只係「純做事」啫，絕無他意。不過佢講一個澳門笑話畀左丁山聽。現今澳門大把遊客，的士司機唔憂做，時時揀客。有兩對夫婦到澳門玩兩日，兩個男人企喺酒店門口傾打波傾到雞啄唔斷，兩婦人唔抵得，行出街截的士，但的士飛馳而過，唔停低，兩婦人冇法子，喝兩位男士出嚟等的士，佢哋就行返埋酒店等。男士喺街邊一揮手，的士立即停低，問佢哋：「想去邊度玩，使唔使我介紹，×××啲金毛女好正……」都未講完，兩婦人出到嚟上車，司機為之色變，幾乎想叫佢哋落車。
點解女士不受一啲澳門的士司機歡迎呢？建築H話：「啲澳門同事話畀我聽，的士載男士遊客，有五成機會去浴室（男士唔係去賭場、浴室就係食肆），而司機載客去浴室，有利是一封，去指定（司機口頭介紹）浴室，封利是更大，但係載女士，好少機會收到浴室利是喎，橫掂生意不愁，揀個男客梗係化算過揀位女客。」
講完笑話，左丁山問建築H點解𠵱家買新樓，張價單咁矜貴，賣樓唔係賣海鮮，推出新盤之前一個星期，做好張價單容乜易？建築H話：「呢個係發展商手法，一來製造緊張氣氛，引你入市，二來佢哋只係想推銷十個八個單位，一搶手，就立即加價賣多二三十個，又賣晒呀，再加價，咁樣嚟推高價錢，邊度會有一張完整價單畀買樓人士睇吖。」十幾年前賣樓，唔見有呢一招喎？現在有，只好說明（一）發展商對賣樓冇信心，（二）發展商要賺到盡，半個水位都殺埋，投機者買入幾個單位去炒，就可以講價攞到啲水位。呢種賣樓手法，表示樓市仍是賣家主導，但買家亦唔笨，唔會踴躍入市。