麥當娜（Madonna）下月中會喺東京舉行佢嘅巡迴演唱會尾站演出，唔少香港明星名人到時都會專程飛去當地朝聖，何超儀都係娜姐嘅超級fans，諗唔到原來佢老竇賭王何鴻燊同娜姐都有段淵源。
「兩公婆親自拜會」
話說20年前，娜姐前夫辛潘（SeanPenn）喺澳門拍攝電影《上海驚奇》（ShanghaiSurprise）嗰陣，有日佢返到酒店，發現有個陌生男人喺房，當知道對方原來係狗仔隊時，辛潘嬲到將個記者吊喺九樓露台。事發後，警方拘捕辛潘，要告佢涉嫌謀殺。呢件事辛潘喺佢嘅自傳都有提到，佢仲話當時係逃獄離開澳門嘅。
但超儀日前所講嘅版本，就同辛潘自傳有啲出入。超儀話辛潘之所以返到美國，原來係賭王幫手，佢話：「辛潘喺澳門出事，有人打電話畀老竇請佢幫忙，後尾救咗佢出嚟，麥當娜兩公婆親自嚟拜會過佢。老竇後尾返到屋企話：『今日有個荷李活女歌星嚟見我，嘴唇仲有大粒癦，但我都記唔起佢個名。」超儀聽完問老爹：「係咪叫麥當娜？」賭王輕描淡寫咁話：「係喇！係喇！係有個唔知乜嘢娜咁話！」超儀話佢當時真係俾老竇激死，竟然見到佢嘅偶像都唔出聲，搞到佢冇得同娜姐近距離接觸！
此外，超儀早排為有線娛樂台節目《活得很滋味》去汶萊拍攝旅遊特輯，眼界大開，佢話：「當哋嘅女人月事來潮，如果喺街外廁所換衞生巾，就會將換出嚟嘅包返屋企，因為佢哋覺得呢樣嘢可以用嚟落降頭喎！」
