長和系中午宣布，大市下晝就插落去，恒指跌205點，收16883，預期的調整目標位16800水平會有支持，短期反彈有機會上番17100。
下禮拜期指結算，大戶殺完好倉後，會點做？港股基本上被「水浸」，確實冇條件會大跌，大戶殺完倉亦冇得再殺，反而有利低吸，唔排除9月份佢哋會造好。
早輪話過，今個禮拜滙控（005）有大批C輪計價，大戶冇理由唔㩒死隻滙控，賺到盡，大市升後回軟，係在預期之內。港股受對沖活動影響，大上大落好敏感，雖然家吓走勢已轉壞，但只要守穩在16800之上，隨時可轉番好。
建星環保（8011）望空衝刺，今個月初推介時0.375元，本周三再提點時係0.55元，跟住兩日內，急升上0.83元，同月初比較，升幅120%！止賺位已不斷上移，賺鋪勁嘅。
安德利果汁（8259）今年上半年業績大倒退，股價急挫到0.445元，但近日已由低位回升上0.58元，升勢有力，主要係有大行趁低收集。安德利係基金股（已公布的持股量達30%），看來佢哋對安德利嘅前景仍然好有信心。
新單提價達5成
06年（12月年結）的上半年，營業額3.5億元（人民幣．下同），升12.7%；盈利僅338萬元，大減94.5%，由於蘋果失收，在上半年繼續影響集團營運，果汁成本升高，毛利率由40.39%大減至18.07%。
不過，低潮已過，行業經營情況在下半年明顯有改善。每年7月至12月屬蘋果榨季，目前的蘋果成本價已較去年底回落，供應亦已恢復正常。同時，新簽的客戶定單，亦會陸續提升價格，平均加幅可達50%。
另外，果膠產業化的關鍵技術已完成，今年下半年可開始批量生產，為集團帶來穩健及可觀的收益。
今年6月，集團透過轉讓咸陽安德利50%股權予AGRANA，進一步在歐洲及其他國際市場開拓分銷渠道，而出售廠房獲利4800萬元。
安德利在內地有6間廠房，明年在大連的生產線投產後，年產量將可上升至25萬噸。
郭兆誠