投注特攻隊同大家見咗面冇耐，好彩一切好快上咗軌道，啲貼士亦見得吓人，希望今次由小弟完成帽子戲法。是日搬上頭版就推介我嘅強項英冠，重點係榜首大戰卡廸夫城迎戰伯明翰一役，伯明翰人腳好，今場又有前鋒謝路美「倒戈」，當然可以睇高一線。冷選方面，就揀作客嘅多蒙特擊敗陣容不整嘅史特加。文：蘋果波神
一直認為今屆英冠係「三強鼎立」，即係伯明翰、修咸頓同西布朗嘅天下，點知卡廸夫城唔聲唔聲嚇你一驚，𠵱家同伯明翰一樣3勝1和，雄踞榜一、二位。但點都好，以伯明翰、修咸頓同西布朗嘅人腳，真係值得長捧，尤其係伯明翰同西布朗；前者喺今夏高價甩咗希斯基同賓納後，簽咗麥舒菲爾、尼葛廸同查廸返嚟，又喺阿仙奴借到梅姆巴、賓特拿同施巴斯坦拿臣，加埋原有嘅鄧尼、米克泰萊同科素等，陣容強勁得嚟又夠鼎盛，季初唔品題，投資隊點對得住大家。
伯明翰人多好辦事
喺周中對梳士貝利場英聯盃，伯明翰就引證咗人多好辦事呢句說話。嗰場波佢哋一對前鋒科素同謝路美表現唔多對辦，於是領隊布魯士㩒掣換咗杜廸利甘保及賓特拿入嚟，即時見效，完場前7分鐘由施巴斯坦拿臣入致勝球，小勝1:0晉級次圈。星期六佢哋作客卡廸夫城進行榜首大戰，「讓球盤」暫為平手，捧佢哋場坐和望贏冇問題。
另外，雖然我甚少揀德甲，但所謂「筍盤無國界」，星期六嘅德甲就有一場冷冷哋嘅心水，就係史特加迎戰多蒙特喇。史特加喺「3條A」（波碧、巴勒哥夫及艾巴）年代雖然係我嘅至愛，但今時唔同往日，上屆隊波俾教練查柏東尼玩殘咗之後，今屆人腳大變，中場蘇度、後衞軒基及翼鋒干查等離隊，並補入前鋒阿歷山大法拿魯特及中場柏維柏度等，搞到隊波演出好鬼有海鮮味，可以喺開鑼戰主場輸畀紐倫堡0:3，但上仗作客9個打11個，竟然贏比勒費爾德3:2！
冷選德甲筍盤多蒙特
不過，佢哋今場迎戰多蒙特時，就有後衞奧蘇里奧同埋達施華停賽，加上前鋒盧保查續要坐波監，實力明顯削弱，就算前鋒卡卡奧頗弗，上場入兩球都唔睇好，反而博多蒙特爆個小冷勝出，打開今屆聯賽勝利之門。多蒙特之前兩場聯賽1和1負，但其實表現唔失禮，今仗有鐵衞禾恩斯復出，後防相信會穩陣唔少，而中前場球員好似希度華廸斯、阿歷山大費爾同施摩拿歷克等，相信亦可以放心進攻，W有2.8倍，可冷敲。
投資特攻隊金句
英冠聯嘅資訊同英超聯一樣咁多，開賽前半至一粒鐘只要肯花啲時間上網Update吓個陣容，投注更穩妥。