本來今個暑假PSP威盡，皆因之前《極魔》、《G-Gen》口碑、銷量不俗，反觀NDS則經過四、五月嘅衝刺後有回落迹象。查實呢啲只係錯覺，因為真正超大作終於來臨：萬眾期待嘅《FF3》（FinalFantasyⅢ）重製版剛殺入香港，基於貨源甚缺，由三百幾蚊一度炒至接近六百，但仍被機迷搶購一空！手提機作品居然賣得貴過家用機，絕對係多年難得一見，亦證明佢嘅魅力係幾咁犀利！
文：陳福榮
唔少人以為NDS隻《FF3》，會似WonderSwan重製《FF》1同2咁整靚少少就算，又或如GBA移植《FF4》追加隱藏迷宮及最強武器咁少嘢，其實佢搞咗咁耐至出只係因為根本就成隻Game做過，仲係由平面進化到完全3D化，認真唔講得笑。由於首批貨量極少，兼且原價已高達六千日圓，所以喺本港部份舖頭曾炒至$480，搞到班熱心正版分子唔想玩ROM（盜版）但又得個睇字，諗起都悲！好彩聽聞今日已經有大貨返到，平均只需約$400左右，較接近日本定價。
超豪同梱版貴一倍
話晒𠵱家係NDS全力催谷市場佔有率嘅黃金期，靠大作出番啲限定版主機「昆」人買多部，都算情有可原，廠商今次推出名為CrystalEdition嘅限定同梱套裝，雖只係一部NDSLite白機搭隻《FF3》，定價仲一個崩都冇平到照賣22,780日圓（約港幣$1,550），不過佢喺機面就印有4個角色及《FF3》Logo，加埋獨一無二機身編號，若然個冧巴靚嘅話就更有紀念價值！根據路邊社消息，由於同梱版貨源唔多，有啲舖頭已標明至少$2,800，差唔多成「13算」！
引入自由轉職概念
好多《FF》迷都對第三集重製版寄予厚望，全因佢當年將職業設定玩得出神入化，替後嚟勁多人鍾意嘅《FF5》埋下伏筆。起初玩家只能使用能力甚低嘅「冒險者」職業，直至完成初期某個任務，得到水晶認同先至會增加職業，從而可以選擇主菜嘅「轉職」指令，呢刻可用嘅僅得戰士、修行僧同黑白魔道士等低級職業，較勁嘅職業如龍騎士、風水師與召喚士等，喺遊戲後段至會出現，不過並非話轉就轉，事關佢設立咗「懲罰時間」系統，喺剛轉職後頭幾場戰鬥能力會大跌，捱過呢段適應期先至回復正常，實在係有辣有唔辣。
16年後極級移植
基本上戰鬥同魔法系統真係完全一樣，即係唔用MP而係好似《FF1》咁按等級嚟劃分使用次數，換言之就算平時慳慳埋埋啲魔法唔用，當嗰個Lv嘅魔法次數用晒，咁你其他Lv有魔法剩都冇用，變相要你用之前諗過度過。
遊戲除咗大地圖外，所有城鎮同迷宮都沿用16年前嘅紅白機版設定，不過就雕琢成冠絕NDS水平嘅超靚級數。暫時所見，寶箱位置同過往相同，即係拎返陳年攻略本嚟玩都無問題！3D畫面明顯落過苦功，最印象深刻係角色轉職後，會喺戰鬥畫面即時反映出嚟，揸咩武器個Look都會唔同，短刀、長劍以至長矛等都能一眼看出，同嗰陣求其Key件武器喺手度，完全兩碼子事！
機迷力撐炒得有理
16年前舊作翻出有乜咁巴閉?居然炒上天價！今日就搵嚟周圍撲緊貨嘅Game舖老闆同勁鍾意NDS嘅玩家訪問幾句，原來佢哋都不約而同認為呢隻大作故事正系統好，加上新版全3D化，絕對被炒有理，事關真係做得正嘛！
Raymond（Game舖東主）
「上星期香港返得好少貨，間間舖都得嗰幾隻，基本上都俾班熟客搶晒。就算嚟貨價都差唔多要四百，出面仲誇張炒到成$480，點知都俾人掃晒！代理原本又話周二返大貨，點知最後乜都冇，搞到同人講唔好意思都講到口水亁！大家畀啲耐性等多一兩日啦。」
Tony（資深機迷）
「𡃁仔嗰陣就玩過『狒狒衫』（《FF3》）啫，好多嘢原本都印象模糊，點知一拎部機上手即刻醒神晒！系統同之前差唔多，玩開都唔使點睇說明書，開場動畫認真正斗，3D畫面亦唔差，Loading情況冇啲人講到咁嚴重。惟獨唔係好夠光，用NDSLite玩要Tune到三級至OK，相比下舊NDS用家就慘情啲。」
