陳婉嫻特登唔去澳洲訪問，都要留喺香港同葉澍堃見面，誓要爭取煲呔在今次份施政報告，落實立法規定最低工資同標準工時，不過葉澍堃似乎企硬唔肯，搞到嫻姐發晒火話：「佢根本都唔想立法，成日喺度砌詞。」鄺志堅仲話葉澍堃「都唔知佢係天真，定係好意。」
嫻姐話同葉澍堃分歧好大，大家傾唔掂數，佢即刻話「我唔收貨。」仲話如果政府堅持唔立法，下次唔使搵佢再傾。嫻姐強硬，唔知葉澍堃會唔會驚呢？嫻姐雖然搞唔掂葉澍堃，但係唔會咁快收手，會繼續向政府同工商界游說，仲話已經定咗個「3+6行動」，由三位立法會議員加上六位勞工顧問委員會代表，齊齊下月喺禮賓府門外靜坐抗議，實行向煲呔施壓。