西甲聯今周揭幕；季初波，亂局多，趁亂就博兩支客隊基達菲同馬德里體育會，可以揚威。
基達菲周日作客奧沙辛拿，以上季數據睇，奧沙辛拿主場真係勁，季初重9連勝㖭；不過今季就唔多睇好奧軍可以再揚威，一來走咗莫夏同馬些路蘇沙兩位中場重心，戰力影響唔少；二來上季意外取得第4，今季初有權打歐冠盃外圍賽，結果被漢堡淘汰出局，不單令球會見財化水，球員士氣亦有好大影響。基達菲一向防守硬淨，今季更有阿根廷門將艾邦丹薛里加盟，呢位仁兄喺世界盃已經打得幾好，一於捧「客勝」。
桑坦德上季僅逃過降班厄運，今季睇嚟未必咁好彩；馬體會今季續擴軍，挑戰三強決心明顯，佩尼亞、米斯達等新兵，都可以「即食」。如果用上季數據分析，以馬體會上季作客踢得咁差，捧桑坦德有着數，咁就後果自負嘞。
聖日耳門「衰波之首」
巴黎聖日耳門已經定性為法甲「衰波之首」，上仗被睇死，竟然主場打贏勢銳嘅里爾，今次周六作客索察又「有番飛」，初盤開平手；如果信聖日耳門有飛必死，博索察啦。講完法國衰波，就講吓德甲衰波史特加，主場輸完3蛋，第2仗作客打少兩個，又可以贏3:2；今次周六主場對多蒙特，咪以為少讓平/半好筍，隨時主場輸埋都得。文：牽牛