無綫新劇《學警出更》的一眾演員，在劇集開拍以來均應監製要求將皮膚曬黑，務求扮演警察角色更神似，主角之一的吳卓羲更索性豪擲過萬元在家中添置曬燈儀器，認真大手筆！
吳卓羲、陳鍵鋒、黃長發及陳凱怡日前在佐敦南京街拍攝無綫新劇《學警出更》首集戲份，當日出動20多名演員、6部警車及多部攝影機，並封鎖整條街進行拍攝，非常大陣仗。附近的玉器商店生意因而大受影響，有部份商店更索性關門暫停營業。
陳凱怡曬出雀斑
劇中演員均應監製要求將膚色曬黑，吳卓羲更斥資過萬港元在家中添置曬燈儀器，他說：「我盡可能都去曬太陽，不過日頭要外景，夜晚又廠景，有時真係冇時間咪惟有曬燈，本身曬燈都有贊助，不過成日要專登揸車過海，𠵱家買呢部雖然只係曬單面，不過初出嗰時要五、六萬，𠵱家萬幾蚊買到真係好開心，可以調校好時間瞓住嚟曬。」
一向皮膚白皙的陳凱怡慨歎自己不但未能將皮膚曬黑，還長出一臉雀斑來，她說：「監製都話上集得我一個曬唔黑，不過我有時間就不停曬，我試過去泰國曬到好黑，不過一個禮拜就已經白番晒。」
期待入營狂出汗
港男出身的黃長興揚言最期待拍攝入營訓練的戲份，她說：「我不嬲都鍾意做運動出汗，加上又唔使咁多對白，我廣東話唔係咁好，𠵱家一收到劇本就要返屋企搵阿爸、阿媽讀劇本畀我聽，我自己就成日睇新聞報道學廣東話，暫時拍得最多係MV，因為冇對白嘛，我都知要學好廣東話先可以有機會做多啲唔同嘅角色。」
採訪：卓美娟 攝影：陳俊強
