肥胖人士特別多病痛，其中「睡眠窒息症」更有可能令肥人在睡夢中猝死。中大醫學院呼吸系統科主管許樹昌表示，患睡眠窒息症的肥人患感冒時，更要格外小心，「因為感冒時，唔可以帶呼吸機瞓覺，所以我哋會叫病人食藥收鼻水，唔使等佢唞唔到氣，同埋要提佢打側瞓，等舌頭放鬆時都唔會阻塞氣道。」
港大醫學院內科副教授張文勇表示，肥胖人士患高血壓、心臟病等疾病的風險，較一般人高兩、三倍，建議肥胖人士定期驗身確保身體健康；不過，他表示，體重在八年內增100磅雖屬極端例子，「但你同我都有可能發生，因為除番開每年都係肥十幾磅，尤其係廿零、卅歲開始，肥咗而你唔理，就會變咗肥好多，所以20歲後，就要注意均衡飲食同適量運動。」
婦產科醫生羅致廉則表示，女士服用避孕丸後，或會令體重輕微上升，但不會令人癡肥。至於會否因為服用避孕丸後，而令內分泌失調導致癡肥，羅稱：「通常都唔會，如果真係增好多嘅話，就要停藥睇吓會唔會輕番，內分泌失調嘅成因有好多，唔一定係避孕丸引起，但短時間內暴肥就要睇醫生嘞。」