噚日有兩個團體見煲呔傾施政報告，佢哋嘅印象係煲呔乜都拖字訣，推得就推。公務員團體終於有機會見特首，公務員工會梁籌庭同華員會黃河一見到煲呔就即刻訴苦，話𠵱家得16萬公僕唔夠人手，尤其萬五名合約員工，更係升遷無期。煲呔聽到加人手，即刻話自己得番10個月任期，做到就做，唔使旨意佢有長遠計劃。
之後到文化界，電影工作總會會長吳思遠同高志森帶隊，吳思遠話香港影業低迷，想煲呔幫手開拓大陸同東南亞市場，同埋資助業界。煲呔聽完，口口聲聲話支持創意工業，不過撥款就驚過唔到立法會喎。班代表仲想煲呔搞番起西九，畀多啲場地表演團體，吳思遠話煲呔表現得好無奈，又話驚到時俾人話「官商勾結」，一招就將責任推晒畀地產商。