醫學會會長蔡堅、副會長史泰祖、郭家麒議員同陳以誠醫生，噚日齊齊反對醫管局准許醫生兼職形式喺局內工作，支取部份人工，同時又可以私人執業，一腳踏兩船。佢哋話胡定旭冇資詢過周一嶽同埋業界就一意孤行，醫學會同其他醫生都睇唔過眼。
過去一直都有醫生離開醫管局後再返嚟教年輕醫生，不過純屬服務性質，𠵱家胡定旭開綠燈，班醫生就可以一邊喺醫院做高級醫生，一邊兼職做私人醫生。史泰祖話：「冇理由唐英年一邊做財爺，又喺出面做私人生意㗎！」其實𠵱家醫管局已經暴露咗好多問題，醫療開支高之外，排期輪候時間亦越嚟越長。如果班醫生個個去秘撈，仲邊有人去做醫生培訓同研究？