新特蘭日前又再輸波，今次喺聯賽盃輸畀英乙包尾嘅貝利，呢隻「黑貓」季初已經5連敗，今個禮拜搵新領隊計劃要盡快落實先得，如果繼續直沉落去，新特蘭都幾危。據講佢哋目標係古比士利，如果成事就好囉。
季初4場聯賽全部輸晒，𠵱家連聯賽盃都出埋局，重要爆冷輸畀一隊乙組仔，而新特蘭唔係陷於低潮都無人信，主席昆尼已經決定辭退兼任領隊職位，專心主席工作之餘，讓出領隊位置，希望聘請一位好領隊帶領球隊重上正軌。
執教查爾頓成績唔錯
如果昆尼今次搵嘅人真係古比士利，我求大俠對新特蘭嘅前景都會抱樂觀態度，因為古比士利以前執教查爾頓有一段長時間，而且執到查爾頓喺英超聯有唔錯成績，證明呢位領隊有料，所以昆尼搵佢帶隊，好多於壞，尤其新特蘭𠵱家季初陷於低潮，對一向有能力將球隊化腐朽為神奇嘅古比士利更加合適。
其實，新特蘭人腳唔差，好似西班牙球員利亞拿、史堤芬伊利洛同根寧咸等，季初連輸都確幾令人費解，只要搵到好領隊，球隊前景仍然明朗，而昆尼唔使再身兼兩職，對佢同埋球隊都係好事，如果最後獲得古比士利出山相助，球迷就千祈唔好咁快睇死呢支英倫東北球隊嘞！
「昆尼終於辭退新特蘭領隊一職，再搵全職領隊負責領軍，當然對球隊係一件好事，起碼昆尼可以專心主席工作，如果由前查爾頓領隊古比士利執教，相信新特蘭球迷會安心好多。」