馮仁昭四圍超：
陳海琪捧中國勁Band全球爭霸

曾經主持過電台節目《海琪的天空》嘅前DJ陳海琪，年初離開咗無綫節目《香港直播》之後，休息咗一排終於有新搞作，原來佢最近成立咗一個音樂品牌PurpleRain，主要推動樂隊文化同原創音樂，下個月仲會同中國廣東省政府電台，喺內地搞GlobalBattleofTheBands嘅中國區比賽，歡迎香港嘅樂隊參加。

陶喆崔健任評判

GlobalBattleofTheBands係世界性大型樂隊比賽，04年開始舉辦，今年大會仲特別邀請咗中國、日本、韓國同泰國首次派代表參賽，勝出者有成10萬美金（約78萬港元）獎金。今屆總決賽將於12月喺英國倫敦舉行，到時中國區冠軍將會同嚟自世界各哋嘅樂隊一較高下，仲分分鐘可以一舉成名㖭！
中國賽區嘅比賽下個月就舉行，海琪日前同馮仁昭通過電話，佢話：「唔理樂隊係咪新面孔，就算老手都歡迎參加，但唯一要求係佢哋要玩真樂器，同埋演繹嘅必須係原創音樂。」聽講海琪已經密鑼緊鼓，聯絡緊陶喆同崔健做評判喇。