Susan離開台灣老家，獨自移居香港已經6年，雖然比較鍾意食西餐，但偶爾都會諗起媽媽煮嘅住家飯：「有時會好掛住媽咪煮嘅魚肉飯，雖然係好簡單嘅飯，但淨係媽咪煮嗰種味道先特別香。香港嗰啲仙乜乜、仙物物，根本就稱唔上台灣風味，太遷就香港人口味喇。」無計喎，台灣菜嚟到香港要本地化，Susan想搵餐住家飯確係難，好彩最近佢搵到一間啱心水嘅台灣餐廳：「之前見雜誌介紹，咪嚟試吓，我本身都唔鍾意太過濃味油膩嘅台灣菜，呢度啲台灣菜清淡新鮮好啱我口味。」
「一葉家」簡單一碗牛肉麵，已令Susan讚歎：「牛肉麵係好易整呀，不過香港一般食肆好少整到台灣嗰種味道，呢度嘅牛肉麵湯底好清香，牛肉夠厚，肉同筋分布好平均，咬落夠腍，好好味。」除菜式夠地道外，就連醬料都令佢想起台灣老家：「呢度好幾款醬料都係香港人好少用嘅，例如樹子醬、海苔醬、蔭豉醬，呢啲都係平日媽咪煮餸會用嘅醬料，感覺好親切。」原來餐廳大廚張師傅曾遠赴台灣參考當地食材，𠵱家舖頭用嘅醬料部份自家調製，部份就由台灣直接入口，難怪訪問期間Susan不時問：「呢隻醬料你係咪買XX牌㗎？」「你哋用嘅蓮霧（台灣人常吃水果一種）係咪喺台灣入口㗎？」多嘢問唔好怪佢，畢竟可以食到一餐家常菜，感到特別窩心。
記者：黃若茵
攝影：陳盛臣
桃園炒蝦鬆潤餅$55
Susan：「新年媽咪會做鬆潤餅，炒熟蝦仁、冬菇粒，捲喺潤餅入面食。雖然材料簡單，但就食得出台灣本土風味。」
三杯雞$55
Susan：「喺台灣多數冬天先食三杯雞，一打開煲蓋就聞到香料九層塔嘅味道。」師傅用黑芝麻油、花雕及台灣豉汁煮製，有酒香但唔會掩蓋雞味。
香菇肉燥筒仔米糕$18
Susan：「台灣夜市嘅米線檔或者擔擔麵檔通常都有呢種米糕賣，係地道小吃。台灣人會撈豬油食，呢度無豬油，不過肉燥豆醬少少辣，好香口。」
一葉家（28568648）
地址：鰂魚涌康山道1號康怡廣場北座2樓S37-38號地舖
