新加坡菜本身融合馬拉菜、南印度菜等元素，唔少菜式都辣字當頭，泳兒喺新加坡住咗十幾年，食辣簡直家常便飯，不過出道後要Keep住靚聲，食辣、凍飲全都要節制。今日佢為一啖正宗Nasilemak，為飯入面嘅一條條辣江魚仔，忘記戒口：「喺香港好難食到正宗馬拉菜，今日要放縱吓，食多兩啖！」
記者：黃若茵
攝影：楊錦文
化妝：RickyLau
髮型：[email protected]
服裝：RNAMedia
新加坡人愛食馬拉菜
入餐廳，見到一碟二碟嘅泳兒就叫：「Nasilemak！」弊喇，我無知，唔知佢講乜㖭！之後佢指住碟馬來椰汁辣飯解釋：「呢碟叫Nasilemak，我喺新加坡成日食，啲江魚仔好好味㗎。」我追問：「辣嘅喎，你唔使戒口咩？」「新加坡人好鍾意食辣，我啲朋友嚟香港旅行都要帶住樽辣椒，我平時見到都好想食㗎，不過食完辣容易喉嚨痛，惟有盡量忍口。」今日佢忍無可忍，仲愈食辣愈有感情。
旅遊局都撐
香港正宗馬拉菜館唔多，泳兒話：「有時行街見到馬拉菜館，都會走入去試吓，睇吓食唔食到由細到大食開嗰種味道，不過講真，都好難搵到正宗口味咯。」難得今日嚟「莎巴」，泳兒食得番兒時味道，老闆唐先生話：「香港少正宗馬拉菜，因為缺少野薑花之類嘅馬拉菜常用香料。我希望做到最近似嘅口味，所以香料同部份食材都由馬來西亞入口。我哋個大廚喺馬來西亞大牌檔出身，日炒夜炒，保證做到地道風味，所以連馬來西亞旅遊局嘅職員都係我哋熟客，佢哋話呢度做得仲好過吉隆坡當地嘅食肆㖭呀。」臨走，泳兒問老闆攞卡片，話下次要同媽咪幫襯喎。
1.馬來椰汁辣飯$50
泳兒：「呢個飯叫Nasilemak，一定要有辣江魚仔、炸花生、青瓜同埋巴東牛，啲江魚仔加入辣味醬料，似香港人食嘅XO醬，用椰汁煮飯係最地道食法。」
2.海南雞飯$65（包雞湯）
泳兒：「雞要用凍水浸過先爽滑，仲唔可以煮太熟喎，飯要用班蘭葉加雞油煮先夠香味，可以配黑豉油、薑汁或者辣椒汁，我就最鍾意辣椒汁，夠惹味吖嘛。」
3.馬沙拉咖喱雞$58
老闆：「馬沙拉本身屬於印度做法，即係用多種香料煮成一個醬汁。馬來西亞人改良，加番茄同青椒，令咖喱散發蔬果味。」
4.馬來西亞貴妃苗$45
貴妃苗即本地溫室蔬菜，鮮菜味道甚濃，好清新。蒜茸炒夠清淡，另推介傳統馬拉盞做法炒，加入蝦膏、蝦米等就十分香口。
5.肉骨茶$48（4-5人用）
老闆：「新加坡同馬來西亞人都當肉骨茶係早餐，所以有油炸鬼伴碟。我哋做嘅係黑肉骨茶，因為加咗熟地，令藥材湯底變成黑色，女仔食對身體好補㗎。」
拉茶$22（4-5人用）
老闆：「客人Order拉茶，師傅會走到客人面前即做。茶入面加咗淡奶、煉奶，撞力令茶同奶溝得更均勻，飲落更加滑。」
食客有Say
搵食攻略
莎巴馬來西亞餐廳（21436626）
地址：灣仔謝斐道98-102號地下
營業時間：星期一至六11:00am-12:00mn，星期日及公眾假期12:00nn-11:00pm
交通：灣仔地鐵站C出口，店外有甚多咪錶位供泊車
座位：60個
人均消費：$85-$100
最好賣：海南雞飯