勝獅貨櫃（716）前日公布中期業績，盈利倒退61%，芬佬即刻掟貨，股價勁跌15%。
昨日各大證券行陸續發表研究報告，雖然有調低盈利預測，但就話前日股價跌得過份，其實隻股並唔係咁差，仍然揸得過，但勝獅昨日仍然微跌0.71％，收4.22元，成交股數685萬股，金額2906萬元。
雖然成班分析員齊聲話勝獅業績令人失望，但就話現時貨櫃銷售量已回復正常，所以唔應該睇得太淡。
另外，剛公布以1.3億元投得湖北污水處理項目的中國水務（855），據講又有新項目收購，而且又係在湖北荊州，但今次係搞供水。經紀黃話，聽講除咗以上兩個項目外，新收購項目將陸續出籠。中國水務早排完成配售可換股債券，集資金額有成3億元，手頭水源充足，自然多搞作。
中國水務股價亦由早前低位反彈，昨日升1％，收2.09元，成交股數525萬股，金額1103萬元。
慕容小初