早幾日蘭西講過，前身係著名客家菜館嘅泉章居，變身成為商場timeplus，以超低租金招租，最近又有新搞作。佢哋花咗成百萬，將商場附近嘅波斯富街電車站改頭換面，格格都印住大大個商場logo，桃紅色夠晒醒目，無論係等電車、過馬路都實無走漏眼，呢一百萬都花得幾抵。
負責幫佢哋搞宣傳嘅美聯話，嚟緊仲會繼續揼本，有一連串鋪天蓋地嘅宣傳，務求令商場開業前，打響名堂咁話。
暑假近尾聲，個個商場都作最後衝刺谷人流，最受「夜鬼」歡迎嘅觀塘apm，就搞咗個「潮人夜書市」，周末仲通宵㖭，新地話5日吸引咗35萬人次，比舊年多25%，生意額就多成20%，有158萬。嗱！夜麻麻都有咁多人打書釘，大家唔好再話香港人無文化。
電郵地址：[email protected]