平叔轉咗去工商及科技局後，噚日喺政府總部中座餐廳同傳媒茶敍。局方今次安排都幾好，除咗招呼周到，有飲有食（有西餅、三文治同生果等，算唔少嘢㗎喇），佢哋仲整咗份報告，講吓重要工作進展同未來工作計劃咁，等大家對個局了解多啲。
最重要係一身輕裝嘅平叔肯坐定定同傳媒傾偈，呢一點就唔係個個局長做到喇，要佢哋唔對傳媒左閃右避已經好難，何況答問題？平叔個局都唔少爭議工作，例如港台就係燙手山芋，但佢都任講唔嬲，其他局長真係要學習吓。
雖然平叔一坐低，新聞秘書就話局長半個鐘就要走人，但最終平叔都遲咗離開。可能因為真係遲，所以走得好急。如果下次時間長啲，就真係prefect喇。