建行（939）今日派成績表，大家都好關心，特別是早排咁多銀行股成績表都唔錯，比較起上來就更加刺激。不過，建行股價過去半年一路冇乜表現，好多人都想知點解。回顧去年10月上市以來，股價唔夠四個月已經由$2.3升上$3.85，足足67%，市值高峯期達8650億港元，可惜之後一直喺三個幾徘徊。股價上升乏力，主要受三大不明朗因素困擾：
1.建行在內地是四大銀行之一，叫做係中央所有，但就衰冇聽中央話。建行的主要收入是賺取貸款利息，當中固定資產貸款（只計基本建設及房地產開發貸款）便由04年12月底的5988億元（人民幣計），增至05年底的7418億，升幅達23.88%。而今年的新增貸款更加失晒控，俾人民銀行罰了800億懲罰性票據，為四大國有商業銀行之冠。猛咁借錢畀好大喜功的地方政府「發展」經濟，搞到經濟熱上加熱；官員為了政績濫借貸，令不良貸款到達危險水平，中央早開聲話要宏觀調控，但建行就偏偏對着幹，令中央好唔滿意。
2.其實大陸銀行股市賬值偏高，令唔少國際投資者有啲戒心。以昨日收市計，市值7600幾億的建行市賬率有成2.762倍，如果市賬率可以落番2.3倍左右，話唔定可以吸引多啲基金入貨，照呢個粗略計算，建行$2.8上下就值得入。
3.建行高層兩年內多次大執位。建行前行長常振明做唔夠兩年，就換咗交行（3328）嘅張建國揸fit。張建國離開交行嘅理由，係「私人理由」同埋「完成國家委以推動國有銀行上市的任務」，大家又接唔接受呢？雖然張建國都算係有豐富市場經驗嘅賓架，但咁樣將銀行高層執位，不明國情嘅老外又會點睇富中國特色嘅國企銀行呢？仲要人家以超高市賬率入貨，暫時都咪使旨意嘞！
「靚佬湯債券」插水大跌
ParamountPictures大股東美國媒體集團Viacom（NYSE：VIA-B）老闆SumnerRedstone話，基於靚佬湯的怪異行為累公司蝕大錢，決定即刻炒佢魷魚，各行各路。Redstone馬後炮計數話，靚佬湯的怪行累公司早前的MI:III少收咗1到1.5億美金。由於水喉被截，靚佬湯嗰邊亦不甘示弱，拍檔PaulaWagner即刻發難話有兩間大HedgeFund將揼水射住佢哋間製作公司，以後唔使再睇荷李活班老闆面色，直接由華爾街揼水。
其實，不單荷李活，任何成熟電影市場，電影固然是電影公司投資項目。而影星與公司，看似是僱傭關係，但實情係所簽的「獨家」合作，與金融市場的玩法，即係A公司與B公司攜手合作搵錢，有異曲同工之處。
思哲非吹水，影星的一言一行，不但影響其本身市值，更會拖垮合作公司的股價。有個網站hsx.com，全名「HollywoodStockExchange」，畀網民免費玩投資遊戲。不過，裏面的「衍生工具」就盡是荷李活的「電影股票」或「影星債券」。舉個例，預計09年上映的超人續集《SupermanReturnsSequel》，𠵱家股價87.42元，可以趁低吸納。另外正在拍攝中，預計明年上映的《HarryPotterandtheOrderofthePhoenix》股價穩步上揚，由招股價不到100元，升至昨日的246.62元。
hsx.com最好玩的地方，在於預測極其準確。靚佬湯債券，00年期間曾上巔峯，（以前靚佬湯是票房保證，頭兩集MI系列分別在96年及00年收4.5億及5.4億美金），但06年的第三集卻只係收得3.9億美金．就係咁，「靚佬湯債券」市值就由巔峯逾5000元，一直插水跌到昨日的120.45元，你都咪話唔準。
長科見家鄉靠小超
長和系盤數出晒名難拆，今日公布業績，分析員肯定有排睇。思哲今次想講吓長江生命科技（8222），資料顯示，小超李澤鉅過去個幾星期已六度增持，而每增持一次，股價就升一次。
坊間傳統智慧，大股東增持，二仔底死跟實冇死。不過，長科真係傷咗唔少李氏粉絲嘅心，所以就算小超以真金白銀表示信心，散戶仍然十五十六。當然，違反萬有引力嘅410倍PE亦係大家唔敢落注嘅原因。話說回頭，長科上半年業績認真唔錯，上半年營業額比去年同期升咗3倍幾，純利亦勁升3.5倍，有成1479萬元，每股盈利有0.19仙，但就仍有排未見家鄉。
今年3月長科供股，共抽水20.8億港紙，不過有乜用就好似冇乜特別方向。猶記得，長和系對上一次配股已經在87年，之後嘅歷史就無謂多講。可能你會當長科係當年長實翻版，諗住刀仔鋸大樹，亦唔介意等20年先知可以升到去幾多，不過思哲仍然要提醒大家一句︰今時唔同往日，當年長實揸FIT人係超人，而今日長科揸FIT人卻係小超，雖說虎父無犬子，而且小超出名比老竇去得更盡（有幾盡就無謂講），總之大家自己諗吓值唔值得跟。
尹思哲