中國人，煮餸最緊要有鑊氣！用生鐵鑊，鑊氣最好！不過一唔小心，鑊氣勁得滯，搞到成鑊油不特止，仲會黐晒底，鑊燶黑麻麻，鏟到手軟都洗唔甩。喂！咪皺眉頭住啦，試吓以下嘅洗鑊方法先，分分鐘你個鑊可以用幾十年㖭呀！
記者：葉雪芯 攝影：黃子偉
模特兒：Katie@PerfectWorkshop
生鐵長情鑊
咪用洗潔精
洗生鐵鑊記住千祈唔好用洗潔精！由於生鐵鑊由生鐵打成，鑊面的粒子較大，如果在生鐵鑊仲熱的時候倒入洗潔精清洗，洗潔精會因鑊的冷縮熱脹而未能清洗掉，殘留在鑊內，當下次再用鑊時，分分鐘連累嘢食都會有洗潔精味㗎！
粗粒子金屬好啱洗
洗生鐵鑊，最好用鋼絲球。因為生鐵鑊屬於粗粒子金屬，如果用一般的抹布去清洗，未必有足夠的磨擦力度去清潔，用同樣是金屬的物料鋼絲刷去清洗，就黐乜嘢底都洗得甩啦！
滾水淥鑊專去油
想去油，最簡單方法是煲滾一煲熱水，直接倒入鑊浸5分鐘再洗，熱力比較容易分解同埋去除油份。
梳打粉唔傷鑊
梳打粉天然又唔傷鑊，只要將鑊放滿水，放入2-3茶匙梳打粉，開火煮4-5分鐘，然後刷洗就得。不想開火的話，可以浸梳打粉水半小時後再刷洗亦得。
用醋揦無黐底
開一鑊熱水，加半碗醋，浸2、3分鐘，然後用百潔布擦亁淨，慳水慳力就可以洗亁淨隻鑊啦！
慳家爛茶渣
想慳家啲，亦可以用飲剩嘅茶葉水連茶葉一齊去洗鑊，因為茶葉屬鹼性，有清潔和分解油份的功用。
易潔鑊 㨘佢好大鑊
𠵱家好多家庭都鍾意用易潔鑊，但大家千祈咪用以上對付生鐵鑊的奇門怪招去洗易潔鑊，否則死咗都唔知咩事！因為易潔鑊面層是一種金屬化學物質，如果鏟甩或刮花咗，會釋出毒素，食咗落肚會致癌㗎！易潔鑊話明易潔，平日用濕布或專用潔布抹拭便可，遇有重油份，不妨用牛奶，因牛奶屬鹼性，有清潔嘅效用又夠溫和，不會傷到個鑊。
鑊燶咁款
撒鹽無晒「焦氣」
煎炸以後，甚或煮燶嘢，重油份及鑊燶就好難對付。用舊咗仲有埋銹迹？其實只要搵啱方法，都唔係咁棘手啫！
銹迹搵洋葱
用鑊煮洋葱可去除銹迹和易啲除去鑊嘅油份！用半個洋葱，切開成一片片，煲滾熱水後放入洋葱，蓋上蓋煮3-4分鐘，倒去熱水，再擦洗亁淨即可。
檸汁除厚油
檸檬汁有清潔效用，在洗鑊時加入5-6滴檸檬汁，其酸性有助去除厚厚的油份。
洗米水防銹
防止生銹及洗走銹迹最好係用洗米水，其含有豐富澱粉質，可洗走鐵銹兼在鐵質上產生保護膜。廢物利用好慳家！
磨砂大法令立立
遇有生銹，先煲熱一鑊水，倒去熱水再用砂紙磨去銹迹，用水沖淨，再用亁布徹底抹亁，再抹一層生油，用慢火烘亁，鑊面即刻光到「立立令」啦！
「鹽析效果」去鑊焦
煎蛋或炒麵後，一定有鑊焦，與其死鏟爛鏟，不如在未洗鑊前，於鑊焦上均勻地撒鹽，然後用火加熱約20秒，再用鑊鏟去鏟時，很輕易便能把整片鑊焦鏟起。事後只要再用清水沖洗，就可以把鑊洗得亁亁淨淨，呢個叫做「鹽析效果」嘅化學反應，鹽份可有效咁將蛋白質及水份分離，令鑊焦分解，而熱力則有助加速這個化學反應。
唔「保」好易老
生鐵鑊：得閒上油
洗亁淨生鐵鑊之後，都要好好保養㗎！記得每次用完之後都要抹亁佢；徹底抹亁後，得閒就抹上一層生油，個鑊會耐用啲，無咁易生銹。保養得宜，生鐵鑊用十幾年都無問題，傳畀你啲仔女都仲得！
易潔鑊：要用木鏟
要避免鏟花易潔鑊，不能用鐵鏟，最好用木鏟。至於用鋼絲刷、任何金屬製或粗糙嘅清潔工具洗易潔鑊都萬萬不可！用抹布就夠㗎喇！
