大陸地方官員為咗搞政績工程，催谷地區經濟增長，爭取好表現博升職，對溫家寶總理嘅中央團隊三令五申一於好少理，搞到8月16日國務會議，溫總以去年7月新豐電廠違規建設及發生重大事故做例子，將內蒙古自治區正副主席三人吊起嚟打，要佢哋交書面檢查。
呢單新豐案影響深遠，可能會煞一煞濫用資源胡亂投資之風，甚至影響香港上市嘅國企。溫總發火之後，但間接貸款畀電廠嘅建行發言人昨晚突然出嚟講嘢，為建行跟蹤客戶貸款資金運用不力變相saysorry，但就點都唔認喺呢件事上違規貸款。呢一着都幾傳統——認一個可原諒嘅過失，交代交代，其他嚴重嘅就唔講。
建行話，雖然事件反映銀行信貸違規發放問題十分嚴重，不過建行只係按規定程序借錢畀電廠個主人內蒙古電力集團，並冇對呢個項目直接貸款，所以違規嘅唔係佢哋喎；又話對於國家政策唔夠敏感，同埋貸款後管理不健全呢類弱點，佢哋必會舉一反三，防止再犯。講到咁，你估溫總收唔收貨呢？