唔少港燦老外，去到廣州都會到荔灣區嘅泮溪酒家（圖），飲啖茶食個包，事關呢間百年老舖，好多中外政要都幫襯過，加上倚湖而建，直頭就係旅遊景點，所以自從7月間舖公布有意出讓，就即刻引嚟唔少狂風浪蝶上門說親，前兩日終於揀定意中人，就係大家熟悉嘅四洲集團！
話晒泮溪有咁耐歷史，又係大家閨秀，所以開出嘅條件都幾辣，既要保留1%黃金股權，又要對方繼續沿用「老字號」，更唔准對方搬離荔灣區，兼且要同班舊員工傾好晒賠償條件，而最緊要就係，必須有豐富飲食經驗。
為咗確保招親過程公平公正，間舖以抽籤形式，喺三十幾個飲食、企管、資產評估專家及律師當中，揀咗十幾個出嚟做評審，結果四洲集團打低其餘七個對手，以3800萬人仔，成功娶得美人歸，集團老闆戴德豐，直頭開心到跳起。