早排係咁打風，唔好話潛水消暑，連出海暢泳都成問題。近日天氣放晴，一眾潛水友已頻頻出動，若你都想趁暑假結束前出海影輯「海底奇兵」留念，就要昅實本版嘅介紹喇，事關唔止有幾款至熱DC同防水殼推介，仲專誠請嚟潛水高手教大家水底攝影嘅訣竅，甚至連潛水裝備都講埋你知，處女下海一樣影到靚相！
記者：陸俊雄
攝影：陳盛臣
ImageGirl：Yannie@Salvador
鳴謝：DennyWong提供部份相片、
DivingExpress提供潛水器材
水底攝影使費平
暑假就快埋尾，年輕人照理乜活動都玩勻晒，就算郊遊影SnapShot，花花草草亦早已影到厭，點都唔及潛入水底影魚咁過癮！雖然香港水質污染嚴重，不過參加一啲西貢出海潛水班，佢哋仍然搵到好多靚海域畀大家潛水影靚相。
目前好多DC都有專用防水殼，一般花費千零蚊就買到個水深達30米以上嘅防水殼，對浮潛或徒潛嚟講已經好夠用喇！跟傳統潛入深水比，浮潛花費較平，基本只須買齊潛鏡、呼吸管、蛙鞋等（共約$700），再加件潛水衣（約$500）就齊晒裝備。嫌貴亦可向用品公司租借，每次都只係$100至$200，絕對豐儉由人。
事前事後別馬虎
今日向大家授課嘅潛水高手Denny，本身為資深潛水教練，佢劈頭第一句就話：「乜都唔好講，先驗查防水殼有冇漏水！」佢仲話最重要係條膠圈，用之前以潤滑油塗勻膠圈，若發現膠圈硬化或變長，就唔好再用。」塗滿潤滑油後，再慢慢放入記憶卡、叉滿嘅電池、Setting好晒白平衡等數值嘅相機。擔心DC焗喺殼內，遇上冷水溫起霞氣嘅話，可喺殼內塗上防霞液或放包防潮珠，之後才鎖實機殼；到影完返上嚟，要反轉向下開蓋，等水滴或沙粒向下流，以防水滴積喺殼內，或滲入相機；之後用清水浸殼，等海水亁後嘅鹽份沖走，再風亁機殼。
兩大步驟不可缺
1.將潤滑劑均勻塗抹喺防水殼膠邊，增強防水。
2.落水前Set好晒所有設定，尤其係叉足電。
影魚要夠光夠近
由於浮潛或徒潛喺較淺水地方進行，見到珊瑚比較多，所以先學影較靜態嘅珊瑚較實際。Denny認為早上10點至中午2點最好影，因為自然光較充足，再配合廣角鏡，光圈用F8或者F11都得，影嘅時候鏡頭仲要向上20度左右，吸收多啲自然光，張相先有漸變效果！如果事前計劃影獨立一嚿珊瑚，用微距突出主體比較適合，構圖亦較靚。
至於想影呢張魚群相，建議近距離先好影。因為喺水入面，快門維持喺1/125至1/30秒，先影到清楚魚群。快門太高速，或離魚群太遠，相機根本吸唔夠自然光畀你影嘢。
處女下海玩上癮
Yannie本身游水唔叻，穿潛水衣玩浮潛更係第一次，佢話：「起初都擔心唔知點浮，又要顧住揸相機，但試過後原來唔算好難。」佢仲想玩耐啲，話要學Denny咁淺水都影到靚珊瑚，深水又影到小丑魚咁話。不過Denny話想到深水地方影魚，真係要考潛水牌先得，$2,800包晒上堂考試，一定要由基本學起急唔嚟。
潛水相機推介
講到水底攝影，介紹DC同防水殼一定唔少得，連Denny都話因為DC普及咗，玩潛水同攝影就一拍即合起嚟。今次介紹4款近期熱門機連殼畀大家，夾啱個價，即刻開始水底攝影喇喂！
DC王富士F30
F30被譽為近期DC機王，佢ISO3200嘅威力，喺水底唔夠自然光嘅情況下影相，都能夠做到反應快同雜訊少，絕對適合水底攝影之用。（a）
專用防水殼：$1,200（防至40水深）
另一高ISO佳作
PanasonicDMC-FX07上個月先推出，新機落地同樣ISO最高達3200。佢720萬有效像素，比富士F30多110萬，而且同FX01係用同一款防水殼，一殼兩用好抵玩。（b）
專用防水殼：$1,800（防至40水深）
水底要大芒
SONYCybershotT30屬3"大芒機種，水底影完相即刻顯示返出嚟，芒夠大當然有好處。佢機身對比F30同FX07，更加輕巧，好適合女仔水底喪影用。（c）
專用防水殼：$1,500（防至40水深）
Canon長賣王
CanonIXUS800IS有幾好賣，到網上論壇睇睇用家對佢勁讚無彈就知道。部機白平衡準確，水底攝影非常講究預先白平衡嘅調校，用佢實冇死錯人。（d）
專用防水殼：$1,430（防至40水深）
查詢：
（a）dcfever（27811780）
（b）信興（28330955）
（c）SonyStyle（23452966）
（d）CanonHK（21702888）