煲呔早前訪問新加坡，點知因為黃亞細肉骨茶搞出唔少風波，真係可憐，最慘係冇得歎鎮星之寶肉骨茶。近日同樣去咗新加坡遊埠嘅張學明，自然要去呢個至Hit景點遊一遊，佢同太太都受到店員好好招呼，除咗食肉骨茶，仲食埋海南雞飯，簡直係一等一享受。煲呔或者可以問問張生，黃亞細肉骨茶係咪真係咁正，非食不可呢？
雖然張學明瘦蜢蜢，查實好鍾意周圍食嘢，今次去到獅城就啱晒，因為佢話河畔兩旁都有擺檔賣嘢食，兩公婆簡直係邊走邊食，捧住大肚腩走人。佢覺得香港嘅城門河、屯門河兩旁都可以搞食肆……八方唔係想掃張生興，不過喺呢兩條河邊搞小食檔，睇嚟剩係得臭豆腐先賣得出。