人怕出名豬怕肥，不過八方始終相信名人之後無論做乜嘢都好辦事啲。好似八方噚日喺「龍匯100」呢項優秀青年活動識到楊永強嘅姪女張珮諺，同埋高永文嘅仔仔高偉琛、高諾琛兄弟，原來佢哋就係經由媽打李麗娟介紹，先至可以喺唔使遴選面試嘅情況下做義工，話晒呢個都係一個集合咗12個國家、100名優秀華人青年嘅交流活動，有機會見識一吓當然得益不淺。
喺英國劍橋讀緊生物嘅高偉琛話，佢同英國讀中學嘅細佬暑假返嚟有機會去西安做義工好有意義，佢又話同張珮諺係familyfriend，一早就識。不過喺港大讀緊法律系二年級嘅張珮諺因為要做開學準備，所以佢只會做香港呢part嘅義工。