古巨基早前到日本的瀑布區取景拍攝新碟封套，找來小朋友及一名老人家合影，代表人生三個階段。長得像《IQ博士》卡通人物小吉的日籍小孩，在拍攝現場突然撒嬌大哭，其父即舉起他拋高倒吊，嚇得基仔目瞪口呆。 日本直擊
古巨基全新廣東碟《Human我生》即將推出，沿用上張大碟班底，由林海峰任封套美術指導，夏永康操刀拍攝。早前一行人飛往日本的日光瀑布區取景，基仔在竹林及瀑布前作冥想狀。
想生番個
唱片公司找來一位非常可愛的日本小朋友和一位長者跟基仔合影，以表達人生三個階段，基仔說：「個小朋友好得意，天生攣毛，好似小吉，第時生個仔好似佢咁得意就好。」
拍攝當日，該名小朋友幾乎舉家出動，雙親和祖父母都前來陪伴拍攝。因從市區到日光瀑布區需逾兩小時車程，故眾人於早上六時便要出發，小朋友到達後累得撒嬌大哭，基仔只好不停逗他玩，沒料到他的父親突然抱起他，舉高拋起又倒吊，動作頗為危險，看得基仔目瞪口呆，但小朋友卻破涕為笑。
之後小朋友的父親將兒子交給基仔，叫他試着跟他玩，但基仔即耍手擰頭，只取出他的早餐蛋糕逗他，小朋友在他利誘下終於肯跟他玩。事後基仔笑說：「原來小吉唔食鐵，鍾意食蛋糕。」
前後呼應
基仔說：「隻碟嘅主題係人生，小朋友同老人家加埋我，就係人生三個重要階段，可以呼應啲歌，因為隻碟第一首歌叫《我生》，即係一個人出世嘅時候，最後一首歌叫《枉生》，中間嘅歌就包含生命裏面唔同階段嘅唔同心情。」
採訪、攝影：蔡如玉
