八方噚朝喺政府總部見到唐英年，佢粒聲唔出兜路走，塊面好似苦瓜乾咁，原來啱啱見完民建聯，聽呢個保皇黨講反對銷售稅，怪不得別有一番滋味。只見司長好似一支箭咁上車飛馳而去，大概係驚又俾記者捉住，問佢點解咁多人反對銷售稅。
一早一晏兩個面口
下晝又再見唐唐，佢要錄影葉劉淑儀個節目，梗係又講GST啦。今回司長自知冇得再避，與其對人黑口黑面，不如扮開心。佢比原定時間遲咗差唔多10分鐘先到，一落車，即刻同記者講「Hello！大家好」，仲全程保持四萬笑容，同朝早頭耷耷個樣簡直判若兩人。入到錄影廠，唐唐繼續向葉劉大晒nice，仲不停撩佢講史丹福：「Stanford嘅紅酒就最好飲……Stanford個校園好大，閒閒哋行一個鐘。」搞到葉劉一反常態，完全唔理記者。
但錄完個節目，唐唐又做番快閃黨走人，唔肯多講一句。其實銷售稅諮詢期有排都未完，唐唐真係點避都冇用。
至於唐唐同葉劉在節目內講咗乜，大家都未知，今日先有得睇。但係除咗史丹福呢啲客套嘢，葉劉一定會問唐唐銷售稅，否則佢呢個節目都唔使睇。
隨時變成23條翻版
八方覺得，唐唐見到葉劉呢位前任保安局局長，應該以舊同袍嘅心態，虛懷啲同葉劉取經。當年葉局長奉老董死命令去推23條，結果搞到聲名狼藉，要辭官同個女執埋書包飛咗去美國。今次唐唐就奉煲呔之命，高調就銷售稅「進行諮詢」，收場分分鐘同葉劉一樣，下屆被中央否出局叫佢歸家打理生意，所以真係一步一驚心。
23條同銷售稅，其實同係惡法，不過前者有保皇黨撐，加上老董支持，所以仲有一半輿論力挺；後者則乜黨都反，而煲呔又閃閃縮縮，迄今唔敢公開表態話集體負責。所以唐司長呢一仗比葉劉更加難打，佢好應該打定輸數，趁機不恥下問，睇睇葉劉有乜秘訣可以東山再起，仲得到北京祝福、本地左派支持，搵美國名牌大學做招牌，搞到煲呔頭赤赤。