追緝兇徒 - 左丁山

追緝兇徒 - 左丁山

星期日下午六點幾,與家人搓緊四圈之時,突然聽到何俊仁在中環都爹利街皇后大道中之麥當勞被四名大漢用壘球棍扑頭,重傷送入瑪麗醫院急症室,為之大驚。何俊仁乃大好人,與左丁山識咗近二十幾年,佢當年搞太平山學會之時,試過搵左丁山入會,研究香港經濟政策。但左丁山生性疏懶,只鍾意研究四隻腳動物,唔想星期六星期日都要開會或上街,阻住入馬場,所以一於話唔制,唔制。

唔同佢做黨友,仍然係朋友,大家經常在皇后大道中碰頭,佢會問吓:「經濟點睇?」左丁山就批評佢哋民主黨的政策近乎社會主義,唔相信市場,大家嘻嘻哈哈一輪。此人自港大讀書成為社會派起,就不斷與國粹派(𠵱家社會上有唔少愛國才俊係當年國粹派)罵戰,三十年如一日,宗旨不改。啲忽然愛國派,回歸後見到升旗嘅感動落淚派,未敢公開擁護祖國取回香港之前,何俊仁已經大大聲講香港必定回歸,無妥協餘地,從呢個角度睇,何俊仁係老愛國,只係不識時務,做唔成俊傑,先至搞到老愛國有國歸不得。
香港係法治之地,兇徒光天化日闖入中環鬧市之人氣快餐店,亂棍棒打何俊仁,其膽大包天,無法無天之處,令人震驚!打人唔會無端端嘅,一定有為而來,如果係政治性,愛國何之政治敵人冇咁低莊啫,點敢冒天下之大不韙?如果係事務性(例如商業紛爭、官司紛爭),香港有法庭解決吖,何必重傷他人?無論係甚麼理由,咁樣打人,就係一萬個唔啱,全港市民必須同聲譴責。曾特首聲言追到天涯海角都要將兇徒繩之於法,希望李一哥喺明年一月退休之前,做齣好戲啦,拉到嫌疑犯嚟慶祝退休。過往一啲高調、有計劃、有預謀嘅斬人、打人事件,都如石沉大海,兇徒逍遙法外,大滅警察威風,大長兇徒幕後人志氣,呢次會唔會又係過得骨呀!有望於○八年一月升做一哥嘅鄧竟成過往有神探之稱,呢位老哥好唔好於升級前,先立一大功?