唐唐sell銷售稅sell到損手爛腳，民望插水，好多官員（當然包括煲呔）見到佢咁慘，都唔敢表態。一向敢言又有料嘅Carrie林鄭月娥就大無畏，夠薑講一句「我係GST擁躉」，唐唐真係要錫晒佢。
林鄭支持銷售稅，唔係純粹支持政府政策咁簡單（事實上佢一向都唔係政府嘅YesWoman）。庫務出身嘅林鄭覺得，香港真係要擴闊稅基，當然，佢覺得推銷售稅前，應該做多啲配套，例如搞好社會福利、醫療同住屋，咁先推得成功。
林鄭鍾意計數，計吓銷售稅對自己有咩影響，佢話就算薪俸稅只減1%，自己都慳唔少，因為佢好少消費（梗係啦，佢一星期做足七日，何來消費機會？），所以GST對佢好着數喎。