隨住國泰吞併港龍，一朝天子一朝臣，兩間公司併合，一定有人要起身。華華噚日先後收到港龍、國泰同埋中航三份新聞稿，一份係離職啟示，一份就係履新通告，仲有一份係董事委任，三單料都關許漢忠事！
傳咗好耐話會離開港龍嘅行政總裁許漢忠，噚日終於正式請辭，下個星期二起身saybye，9月1日就會去中國航空集團旗下嘅中航集團做董事。
新安排背後玄機
許漢忠不容於國泰係人都知，呢件事耐人尋味嘅係，國航將港龍賣斷畀國泰後，許漢忠暫時歸屬國航系統，但許漢忠唔係加入國航，而係加入國航個阿媽中國航空集團下面間子公司擔任董事，呢間公司主要投資飛機維修、飛機燃油、機場營運等業務，算係國航姊妹公司，對於許漢忠，咁算唔算係明升暗降呢？定係過冷河嘅一個安排呢？
舊人去新人來，接替許漢忠做港龍行政總裁嘅，係駐台灣嘅太古汽車總裁鄧國杰。佢79年入國泰會計部，94年做企業財務部總經理，97年被委任為華民航空常務總裁，千禧年就出任國泰貨運部總經理，都算平步青雲。華華八到佢除咗有個特許會計師牌，亦有個寶貝女。
李華華