孫柏文相信大家見到今日《金手指》條題「球證已經被收買你仲去賭？」，一定心諗我又再次講波。首先，經過世界盃一役，我叫大家買花旗國國家足球隊做小組冠軍之後，花旗國足球隊成為小組「大包尾」，所以我呢個財經口水佬會盡量避免再講波。不過，上個禮拜由前宗主國倫敦傳來嘅一段關於原材料買賣嘅新聞，就令到我唔用「球證被收買」呢個足球比喻都唔得。
講呢段「好離譜」嘅新聞之前，畀大家一啲背景資料。前宗主國有當今世上其中一個最大嘅金屬交易場，叫做倫敦金屬交易所LondonMetalExchange（下稱LME）。喺LME裏面，大家可以自由買賣各類金屬，有銅、鉛、鋁、鋅、錫、鎳等等，佢哋亦與時並進地引入塑膠原料買賣。而LME本身亦有逾一百年歷史，成交量高，又有可以提走實貨嘅保證，所以喺世界各國，好多人就算喺場外自行買賣，都會參照LME嘅成交價做買賣。
大家可能會問：「唔通孫柏文今日想話LME突然『造馬』，叫大家避開喺嗰度做買賣？」果然聰明！其實，喺任何交易所，每次有人入貨買升同一個人出貨買跌做交易嘅時候，就好似兩隊足球隊對壘。交易所就擔當做球證嘅角色，確定每場球賽喺公平嘅環境之下進行，球賽踢完之後，每一隊輸或贏都要面對賽果。不過，上個禮拜LME就將長久以來定下嘅規例扭曲，喺買賣鎳嘅市場裏面，將交收日推遲一日。佢哋話理由係鎳出現嚴重短缺，賣方根本冇足夠存貨交畀買方，所以為求「市場穩定」同「為免有人不履行合約條款」繼而唔交貨，出現default場面，佢哋就將交收日推遲一日。
扭曲買賣程序
情況有如喺港交所買賣股票，突然間港交所宣布，有一間上市公司嘅股票，因為有太多人喺「冇貨拋空」嘅情況之下，到交收日交唔出貨，所以該上市公司嘅股票，就由交易日數起嘅兩個工作天進行交收，編成三個、四個甚至五個工作天之後，等到班「冇貨拋空」嘅人開始慢慢搵貨來做交收。
大家可能會問：「畀多些少時間人搵貨番來做交收，有乜問題？」首先，如果你係一個接咗好多單嘅不銹鋼廚具製造商，喺LME買咗好多鎳來做廚具，你原先計數包埋船期、製造時間等等，需要喺某一日收到啲鎳，等有足夠時間上船。𠵱家，交易所宣布你唔可以喺嗰日收到貨，船又唔等你，但你冇原材料，仲唔死？
仲有，正當買跌「冇貨拋空」嘅人被迫要在某一日交貨嘅時候，佢哋就需要周街撲貨。喺撲貨嘅過程當中，推高該貨品嘅價格，亦即係買升嘅人夢寐以求嘅「夾淡倉」情況。鬼叫嗰啲買跌嘅人睇錯供求關係，睇錯市。不過，正當交易所扭曲買賣程序，特登畀多啲時間嗰啲買跌嘅人去搵貨做交收，就簡直係偏幫佢哋。情況有如一場球賽去到90分鐘完場，你隊波贏緊，不過球證宣布加多30分鐘比賽時間，等對方可以追和。
其實，有一種金屬出現非常嚴重嘅「冇貨拋空」情況。呢種金屬就係白銀。如果到時世界各大白銀交易場，相繼宣布拋空嘅人毋須交貨，就即係你買咗等於冇買。如果今時今日歷史悠久嘅LME都可以偏幫拋空嘅人，你仲可以幫襯佢哋買紙上白銀咩？都係聽孫柏文話，走去買實貨白銀算了。
孫柏文